sábado, 27 de abril de 2013

O NOSO PRIMEIRO TRÍPTICO

Faime especial ilusión presentarvos no noso blog o noso primeiro tríptico. Gazas pola vosa acollida!


mércores, 24 de abril de 2013

PARABÉNS AOS LECTORES!

Ola rapaces!
Fagin
Sí xa sei que fixo calor na biblio. Case afogo eu tamén no meu recuncho. Pero non é esta temperatura a importante, senón a do voso entusiasmo. Penso que acabamos de vivir dúas fermosas xornadas de celebración nas que todos colaborastes para que fosen unha auténtica festa do libro e da lectura. Queixáronse os de bacharelato de quedar fóra por este ano, pero os profes, polo que escoito dende aquí, están dispostos a facer novas actividades para eles. 
Magwitch e Pip
Coa inapreciable introdución de Guillermo e Dani, revivimos as aventuras de Pip e de Oliver na nosa biblio. Aprendéronme como nas novelas hai personaxes de caracteres bondadosos ou crueis, algúns deles van cambiando co tempo, moitos acadan un "happy end" e outros non. Disfrutei das vosas dramatizacións, tras as que coido que houbo moitas horas de ensaio. Especialmente me gustou mirar alguns dos vosos rostros escoitando aos compañeiros convertidos en Mr. Bumble, Monks, Sikes, Stella, Joe Gargery, Mrs. Havisham, Mr. Jagger,..., ademáis de Oliver e Pip, claro. 


Caratulas de distintas adaptacións cinematográficas

Algúns sorríades dun xeito especial. Estabades redescubrindo o inmenso poder da narración, como cando, de nenos, gustábades escoitar a vosa nai o conto de antes de durmir. Sí foron momentos máxicos. Por unhas horas, fantasmais presenzas que só habitan nas páxinas dos libros, encarnarónse diante de todos. Había tempo que non tiña tan ilustres visitas na miña casa. Oxalá veñan moitas outras veces. E se queredes que vos acompañen a vós, soamente tedes que elixir un libro, abrir a súas páxinas e mergullaros no seu universo.
Mrs. Havisham e Stella

Facede a proba.

luns, 22 de abril de 2013

UN SAÚDO MOI ESPECIAL CON MOTIVO DO DÍA DO LIBRO

Ola rapaces!
Hoxe quero saudar dun xeito especial aos internautas que acaban de conectarse a este blog co seu móbil a través do código QR do noso tríptico. Escribo isto a piques de comezar o Día Mundial do Libro no que espero que todos disfrutedes coas actividades que con esforzo e agarimo prepararou o Equipo de Biblioteca. En breves días colgaremos resumos, videos e opinións sobre as mesmas. Non deixedes pasar a ocasión de deixarnos tamén os vosos comentarios. Traballamos para vós.
Como xa sabedes, este curso 2012-13, as actividades dedícanse a Charles Dickens e contamos coa colaboración das mellores voces do alumnado da ESO nas súas lecturas dramatizadas de Oliver Twist e Grandes Esperanzas. Este autor tamén está presente nos preciosos traballos e maquetas de alumnos de 1º da ESO que adornan a entrada da miña casa. 
Se vos gusta a idea, adiante! As homenaxes a persoeiros das artes e da cultura non fixeron máis que empezar. E se non, consultade a árbore que tamén decora o tríptico e máis a nosa porta.

mércores, 10 de abril de 2013

As fotos das cometas:

Ola poetas:


O libro de Cometas en el cielo de Khaled Hosseini deu para moito, verdade? Ademais o traballo que fixeron Elisa e Amanda foi moi maduro. Claro, os libros que tratan sentimentos, erros, culpas, arrepentimentos, cariño, abandono... son moi cercanos a nós. Moito máis cercanos se están ambientados, ademais, no mundo real.

Podémonos ver reflectidos en Amir, se somos conscientes de termos portado mal con alguén que queremos, ou, pola contra, sentirnos identicados con Hassan, se é que nos sentimos defraudados algunha vez por quen queriamos moito. 

A min paréceme que todos somos un pouco Amir e un pouco Hassan. Moitas veces ao longo da nosa vida nos sentimos molestos pola actitude de alguén en que tiñamos posto moito cariño e, sen embargo, o seguimos querendo. Ou pola contra, portámonos mal ou temos un mal xesto con alguén que nos quere ben. 

O principal problema nas relación é a incomunicación. A falta de comunicación entre Amir e Hassan rematou cunha bonita amizade. Do mesmo xeito, Amir só terá unha relación sincera co seu pai Baba cando se faga un mozo e comparta as dificultades dunha nova vida nos Estados Unidos de América. A vida está chea de decisións e ás veces ponse difícil. Este soberbio libro, escrito desde o fondo da alma, ensínanos a non nos encerrar en nós mesmos, senón a compartir as nosas dúbidas, os nosos medos, as inquedanzas, os soños; a contar a verdade (de verdade) sen medo. Porque podedes estar ben seguros de que todos (e penso que tamén todas) somos coma as cometas: só estamos unidos a ti por un delgadísimo fío que hai que saber manexar con moita pericia, soltando e dando ás, pero tamén atraendo e guiando na procura de brisas que nos dirixan. Así é a amizade, poetas. Cultivádea. Non deixedes que se escapen as cometas.

Ah, claro. Déixovos unha breve presentación das fotos da  sesión de onte do club de lectura: pizza, refrescos e boa literatura. Mmmmmmm... que rico!

Cometas en el cielo. on PhotoPeach

martes, 9 de abril de 2013

A NOSA NOVA XUNTANZA

Ola rapaces!
Soamente dúas palabras para recoller a miña primeira impresión da nosa xuntanza de hoxe do Club de Lectura. Cada día percibo que estades máis cómodos na miña casa, a biblio. Non sei si será polos sofás, o polas pizzas de hoxe...
Antes que nada, teño que felicitar ás nosas moderadoras da sesión de hoxe: Elisa (5ºB) e Amanda (3ºA). Con gran estilo nos achegaron a peripecia vital de Amir e Hassan, no convulso Kabul anterior a chegada do exército ruso. Repasaron con todos, tamén, a experiencia traumática que separou aos dous amigos, a fuxida de Amir e seu pai a California e a dura redención da súa culpa, vinte anos despois, noutro Afganistán, tan distinto ao paraíso da súa infancia.
Durante a charla escoitamos moitas intervencións que enriqueceron a visión do libro.
Pronto subiremos ao blog a presentación das nosas colaboradoras, así como as fotos. 
Seguide pendentes da vindeira sesión, na que o noso protagonista, será o mundo do cómic
.