3-5-2016: O XORNALISTA MIGUEL ÁNGEL AGUILAR NO SOFÍA

Fotografía: Faro de Vigo, 26-4-2016

Miguel Ángel Aguilar recibirá o Premio José Couso de Liberdade de Prensa en Ferrol o día 3 de maio (Día Mundial da Liberdade de Prensa). Ese mesmo día estará no Sofía e conversará cos alumnos sobre a súa experiencia como comunicador.

Esta actividade está organizada polo Colexio Profesional de Xornalistas de Galicia (http://www.xornalistas.gal/) e inscríbese dentro do proxecto ‘Xornalismo na Escola’, consistente en impartir talleres en centros de secundaria para alumnado de 3º ou 4º da ESO. Nestes talleres faise unha primeira aproximación ao que é o xornalismo, o papel do xornalista, os dereitos fundamentais de informar e ser informado e outras cuestións relacionadas coa comunicación. 

Os alumnos de 4º ESO que, coordinados por Juana Brañas, están a preparar un TELEANUARIO, de seguro tomarán boa nota desta experiencia e do encontro con Miguel Ángel Aguilar.

Miguel Ángel Aguilar (Madrid, 1943).

• Licenciado en Ciencias Físicas pola Universidade Complutense de Madrid (1965) e graduado na Escola Oficial de Xornalismo (1969).

Prensa escrita.

• 1967: Comezou no xornalismo no diario Madrid (1967). A consecuencia dun editorial que publicou sobre os disturbios universitarios do momento, foi encausado polo Tribunal de Orden Público. Tras ser xulgado, foi absolto. 
• 1971: Incorporouse a Cambio 16, do que foi director (1978 a 1980). En 1975 foi enviado especial desta revista ao Sahara.
• 1980: EL PAÍS (ata novembro de 2015). Foi cesado por criticar o periódico nunha reportaxe aparecida en The New York Times.  
• 1981: Funda a sección española da Asociación de Periodistas Europeos..
• 1986-1990: Director da Axencia EFE.
• Na actualidade escribe para La Vanguardia, Cinco días e El Siglo. É presidente editor do semanario Ahora e Secretario Xeral da Asociación de Xornalistas Europeos.

Radio e Televisión.

• Incorporouse aos servizos informativos de Telecinco: colaborou  como comentarista para asuntos de actualidade política nacional en Entre hoy y mañana;  en 1992 presentou o informativo de fin de semana. Seguiu colaborando nos informativos da cadea e presentou os espazos de debate e entrevistas Mesa de redacción (1993) e Hora límite (1995).
• Na actualidade é comentarista e analista político en distintos programas tanto de radio como de televisión: Hoy por Hoy, Hora 25 da Cadena Ser; El Programa de Ana Rosa (desde 2004) de Telecinco; 59 segundos (desde 2004) de TVE; Más vale tarde de La Sexta. Ten unha sección en Hora 14, emitida diariamente na Cadena SER.

3 de maio: Día Mundial da Liberdade de Prensa.

CHARLOTTE BRONTË

O martes, 8 de marzo, nunha clase de 1º ESO estivemos vendo esta imaxe (cumpren anos 2016):

Pulsa na imaxe para ampliala.

Entra no Pinterest "2016: Cumpren anos" desde o menú do blog ou por aquí.

- Só unha muller en 900 anos. Por que? -Dixo a profesora.

- Non lles deixaban -contestaron uns alumnos.

Efectivamente, así de triste: 

Non lles deixaban. Non lles deixaron.

Pois ben, rindamos homenaxe á única muller que figura nese cartel, Charlotte Brontë. Que ela represente a todas aquelas mulleres que quixeron ser filósofas, científicas, pintoras, escritoras, inventoras, compositoras e "non lles deixaron", por aquelas que quixeron ser e non foron. E por Charlotte que, a pesar das circunstancias adversas, loitou por ser o que quería ser.

Os alumnos de 1º ESO inician un traballo de investigación e tratamento da información no que teñen que xogar con estes parámetros:

• Charlotte Brontë, como representante das mulleres escritoras ás que "non lles deixaban".
• A prensa, como única fonte para buscar esa información.
• A guía ALFIN5 Sofía, para organizar o proceso.

Ir a http://kiosko.net/

SOCAS INFORMA: "SAÍMOS NO DIARIO DE FERROL"

Xa empeza a ser un costume iso de saír na prensa (Vid. Diario de Ferrol 30-X-2013), pero o novo é que me saquen a min. Eu tamén teño o meu corazonciño, e quedei abraiado ao ler no Diario de Ferrol de hoxe, case en primeira plana, a noticia sobre a incorporación da nosa biblioteca ao Plambe. Pero e que, lendo polo miúdo o texto, ata citan ao meu creador, Adrián Rodríguez Nicolás. Cito: "ao longo dos vindeiros meses, a mascota da biblioteca, "Socas" -cuxo autor foi Adrián Rodríguez, alumno do centro ata o ano pasado-, encargarase de ir anunciando calquera novidade dunha biblioteca que inicia unha nova andaina..."

Penso que o texto fai xustiza ao traballo que estades todos realizando, e que convén difundir con moita confianza en nós mesmos para seguir facéndoo. 

Noraboa a todos por esta entrevista que nos anima a tirar para adiante.

Abrazos:

Socas, O Mediático.