Lorenzo Silva. Premio Planeta 2012 por 'A marca do meridiano'

Gañar o Planeta non garante ter escrito unha boa novela, pois os intereses que se moven tras estes premios mediáticos son, cando menos, sospeitosos. Pero este ano o premio recaeu sobre, ao meu modesto parecer, un dos mellores escritores de novela negra. E non é que Silva estea encasillado neste xénero (é un autor moi prolífico e versátil), pero a novela premiada é a sétima entrega da serie negra "Belilacqua e Chamorro".

Bevilacqua, tamén coñecido polo alcume de Vila, é sargento/brigada da Garda Civil e protagonista, xunto á garda/cabo/sarxento Virginia Chamorro, destas novelas policiacas de éxito. Unha das cales, "El alquimista impaciente" (premio Nadal 2000) foi levada ao cine en 2002.

A saga ten todos os ingredientes do xénero: un detective agudo, que se sae do patrón (é garda civil e non policía, licenciado en psicoloxía, e choca de frente coa ineficacia dalgúns superiores), con unha vida sentimental rota (cúlpase do fracaso do seu matrimonio e da distante relación co seu fillo) e, como non, con unha compañeira inseparable (Chamorro). A relación entre eles é un dos alicerces, co seu constante tanteo e un previsible achegamento que nunca chega. Eu recomedaría ler calquera destas dúas: "La estrategia del agua" (2010) e "El alquimista impaciente".

Para os membros do clube máis novos, dicirvos que Silva escribiu tres libros para adolescentes moi interesantes e que despertarán ainda máis a vosa conciencia social: a triloxía de Getafe ("Algún día, cuando pueda llevarte a Varsovia", "El cazador del desierto", "La lluvia de París") ..... pero esta é outra historia.

"A praia dos afogados" de Domingo Villar

Hai tempo lin unha novela que me enganchou, e que recomendo aos alumnos de bacharelato.

Algúns chámanlle o Stig Larsson galego, pero agás de compartir xénero, a mín non se me parece para nada.

Dúas personaxes moi ben definidas: O inspector Caldas, máis parecido ao inspector Wallander de Henning Mankell que ás personaxes de Millenium, investiga a morte dun mariñeiro que aparece nunha praia da vila de Panxón, na ría de Vigo. Un caso difícil para Caldas, que pasa malos momentos.

E Rafael Estévez, o seu axudante aragonés, que non se dá adaptado á retranca e os sobreentendidos dos galegos, non parece servir de moita axuda, e colle une tremendos rebotes coas respostas ambigüas desta xente que non entende.

Unha parella que daría moito xogo nunha película ou nunha serie televisiva (esta é a segunda novela do inspector Caldas, e pode haber máis entregas).

Hai unha novela anterior chamada "Ollos de auga" que non me gustou tanto porque o desenlace me pareceu previsible.