ÁRBORES NO SOFÍA

O día da árbore... Tanto como lle debemos ás árbores, que sería de nós sen elas? No IES Sofía Casanova podedes visitar estes días distintos tipos de árbores vistos desde diferentes disciplinas. Hoxe queremos achegarvos a contribución da Biblioteca a esta conmemoración.

Árbores e bibliotecas. Había tantas posibilidades... Que os libros son de papel, que o papel vén das árbores, que hai itinerarios lectores sobre árbores... E "ler ciencia", porque aí estamos. Foi doado, tanto como relacionar árbore-ciencia, "Árbore da ciencia". E entre as posibilidades escollemos a Árbore da ciencia de Ramón Llull (carteis exposición). Por que, diredes? Por moitos motivos. Algúns:

• Ramón Llull viviu no século XIII e principios do XIV. Época medieval, a época dos códices. Recordades? Non? Pois mirade este enlace (elaboración dun códice medieval). E ten certo "parecido razoable" con Guillermo de Baskerville, personaxe de... Seguides sen recordar? Outro enlace... Na Biblioteca do Sofía "toleamos" polos códices. Serviron -hai xa dous anos- para rotular a biblioteca con imaxes tiradas dos códices das Cantigas de Santa María (idea dunhas alumnas que están hoxe en 3º ESO). Fixemos -e seguimos a facer- o proxecto "Evolución dos soportes lectores: dos códices á imprenta e da imprenta á era dixital", proxecto que deu pé a varias viaxes culturais: estivemos no arquivo da Catedral de Santiago vendo os códices de cerca (demasiado de cerca, se cadra); e en Oseira; e fomos ver a exposición do gravado no Gaiás... E seguimos traballando, porque a próxima viaxe ao mundo medieval irá polo camiño "De Lago a Santiago" (en elaboración).

• Ramón Llull concretou na Árbore da ciencia unha clasificación das ciencias en 16 árbores que resulta, a día de hoxe, máis que interesante. Cada unha das 16 árbores de Llull representa unha ciencia (Física, Botánica, Bioloxía, Artes, Antropoloxía, Ética, Política, Astroloxía, Lóxica… ata 16). Vid. imaxe que segue (base: ilustración de 1505; a Árbore da ciencia orixinal é anterior, data de fins XIII-principios XIV).

     

• E escribía en catalán (tamén en árabe e latín); un sabio mallorquín ligado á corte de Aragón e Mallorca (formado na corte de Xaime I de Aragón, o Conquistador, e protexido do seu fillo Xaime II de Mallorca), contemporáneo de Afonso X o Sabio de Castela (Afonso X estaba casado con Violante de Aragón, filla de Xaime I e irmá de Xaime II), que serve para dar unha imaxe clara do que era o panorama lingüístico na Península Ibérica durante a Idade Media. 

        Enlace aos carteis da exposición.

Por certo. parece que todo coincide, desde a árbore de Llull saíron distintos itinerarios que conflúen no Camiño de Santiago. E ademais, "cumpren anos"...

• VII centenario da morte de Llull (morreu no 1315). Peregrinación de Llull a Santiago: na imaxe, Llull ante o apóstolo tal como o ve o seu discípulo Thomas Le Myésier en Breviculum, 1321, Badische Landesbibliothek, IBIS. Vid. nota ao pé. Por certo, Llull, era franciscano e...

• VIII centenario da peregrinación de Francisco de Asís a Santiago: Exposición San Francisco no Camiño de Santiago: Occidente, o Islam e Terra Santa no tempo de Francisco de Asís, presenza das ordes mendicantes no Camiño de Santiago, cadros do Greco e Zurbarán, esculturas de Salzillo, Xosé Ferreiro e Salvador Carmona, pezas medievais de época de Francisco de Asís procedentes de Inglaterra, Francia, Italia, Terra Santa, Al Andalus e Galicia. Dous peregrinos medievais ilustres entre tantos que percorreron o camiño, pero... Como empezou todo?

• Exposición: "Camiño. A orixe", na Cidade da Cultura. Desde o punto de partida (ano 820, o eremita Paio acha a tumba e interveñen o bispo Teodomiro e o rei Alfonso II o Casto) ata chegar ao que logo sería Compostela e o fenómeno da peregrinación. Exposición con obras de Durero e Murillo, entre outros.

Pois ben. Nós xa tiñamos previsto facer o camiño desde o Sofía cos trobadores medievais (mirade o site en elaboración "De Lago a Santiago") e percorrer as rúas e espazos da cidade ligados a estes poetas (vid mapa no site). Pero agora, con máis motivo: ademais do roteiro dos trobadores, que nos transportará aos séculos XII, XIII e principios do XIV, temos esas dúas exposicións (a orixe do Camiño (séc. IX) e o Camiño en tempo de Francisco de Asís (séc. XII-XIII) que hai que ver necesariamente. 

Imaxe

Nota.- Ramón Llull foi tamén poeta cortesán, prosista, filósofo, divulgador científico, alquimista, teólogo, eremita, frade franciscano, misioneiro, místico, cruzado, profesor na Universidade de París, viaxeiro incansable... Seguides sen ver -cando menos nalgúns aspectos- "parecidos razoables"? 

ESTREA DA OBRA "O TESTAMENTO DO TÍO NACHO"

A semana pasada tivo lugar no noso recentemente arranxado salón de actos a representación da obra baseada no conto de Francesc Eiximenis, O testamento do tío Nacho dirixido polo profesor de Matemáticas José Luis Paz e protagonizada por alumnos do grupo de teatro do noso centro. Estes alumnos (pertenecentea a cursos dende 1º ESO a !º BAC) levan ensaiando todo o ano con moita ilusión para aportar o seu grao de area aos actos de celebración do 50 aniversario do IES Sofía Casanova. Destacamos o bo facer de todos (actores, técnicos, decoradores, músicos...) que nos fixeron pasar un bo rato coa avaricia da Maruxa para sacar o máximo proveito da herdanza do seu home.

Cartel realizado por Antía López

As fotos da lectura de Dickens:

Ola poetas:

Aquí tedes as fotos das sesións de lectura de Grandes esperanzas e de Oliver Twist de Charles Dickens que  fixemos os días 23 e 24 de abril para celebrar o día do libro.

Dickens en el Sofía. on PhotoPeach

Lembrade que, se queredes, podedes consultar toda a información sobre Dickens nesta páxina, así poderedes ler as obras ou ver as películas e as presentacións que preparamos os profesores do departamento de lingua castelá e literatura.

Espero que estas sexan unhas lecturas das moitas que fagamos na bibioteca.

Bo día.

DENDE O MEU RECUNCHO

Ola rapaces!

Hoxe levanteime cedo -por fin un día soleado logo destas pertinaces choivas- e púxenme a navegar un pouco pola rede. Deime conta de que está a piques de rematar o mes de marzo e non vos escribín ningunha mensaxe no noso blog en todo este mes. Teño disculpa. Estiven tan atarefado colocando mobles e libros na miña casa -a nosa biblio- que esquecín darvos noticias de mín. Aínda non rematei as reformas (sábese cando comezan, pero non cando rematan), como podedes comprobar, pero estou máis preto de facelo. Moitos de vós axudáchedesme cos cambios na biblio e teño que darvos as grazas. E coido que no vindeiro mes, no que celebramos o Día do Libro, teremos bastante adiantado. Mentres, tede paciencia conmigo.

Falando do vindeiro mes, aproveito para anunciarvos algunhas novas:

• O día 9 teremos a sesión do Club de Lectura correspondente ao libro de Khaled Hosseini: Cometas en el cielo, que espero que estedes a disfrutar. Tocábanos unha novela realista, e penso que a historia de Amir e Hassan profundiza dun xeito conmovedor nos sentimentos, ás veces duros, do ser humano nun marco tan convulso como o Afganistan dende a dominación soviética ata o rexímen talibán. Emplázovos ata entón.

• O día 23, co gallo do Día do Libro, teremos unha celebración sorpresa da que só podo adiantar que terá que ver co pasado aniversario do célebre escritor británico Charles Dickens (1812-1870) do que xa falamos noutra entrada do blog, nos seu momento. Penso que contarei coa vosa colaboración.
• Dentro de pouco, presentarémosvos os nosos 13 cumpreanos do 2013. Alí mesturaremos escritores, pintores, músicos, presidentes, cidades, apóstolos... E non dou máis pistas, que todo o pillades.

E nada máis polo de agora. Sabedes que xa se pode consultar os  nosos fondos na rede porque estamos no programa Meiga. Seguro que alí atopades moitos tesouros que vos poden descubrir mundos que pagan a pena. 

Así pois, no formato que queirades, do xeito que prefirades, na lingua que desexedes, no momento por vos escollido..., non deixedes de LER!

DÍA DEL LIBRO

Se acerca el 23 de abril, Día del Libro, y desde el IES Sofía Casanova queremos sumarnos a esta conmemoración. Para ello hemos organizado una serie de actividades que esperamos sean de vuestro agrado. Dejamos constancia, de este modo, de nuestro sincero reconocimiento hacia ese objeto tan incalculablemente valioso como es EL LIBRO.