martes, 18 de xuño de 2024

TRABALLO INTERDISCIPLINAR SOBRE AS SINSOMBRERO

Ola rapaces!

Queríamos comentarvos o traballo interdisciplinar realizado polas alumnas e os alumnos de 4º de ESO durante este 3º trimestre sobre “As Sinsombrero”, as mulleres da Xeración do 27.

Traballouse de maneira interdisciplinar nas áreas de Lingua Castelá e Literatura con Daniel, Lingua Galega e Literatura con Lucía, e Dixitalización con Marta.

O obxectivo foi reflexionar sobre o papel activo da muller nos ámbitos culturais, artísticos e de pensamento nas décadas de 1920 e 1930, o seu olvido premeditado durante o réxime de Franco e a revalorización do seu labor.

Todo o montaxe cos vídeos e presentacións podedes disfrutalo nestes dous enlaces google site e en canva

Parabéns aos profes e ao alumnado polo seu esforzo!

xoves, 13 de xuño de 2024

COMIDA DE DESPEDIDA DOS CLUBS DE LECTURA E ROTEIRO SOBRE CINZA

 Ola rapaces!


O pasado martes tivemos un dobre evento na biblioteca. Despedimos o curso cunha comida cos alumnos da ESO, preparada con agarimo por Gloria. Logo de facernos fotos de grupo, xuntámonos na biblio para  falar da nosa experiencia durante este curso. Algúns rapaces sacaron libros para o verán.



Cos rapaces de Bacharelato (e algúns da ESO) percorrimos un roteiro tralas pegadas da novela gráfica Cinza, lida meses antes e comentada co seu autor, Xavier Alcalá. Dani explicounos algúns aspectos dos espazos da novela tan fielmente ilustrada por Manel Cráneo. 

Visitamos o Instituto Concepción Arenal decatándonos das semellanzas entre as ilustracións e a realidade: a portada, cunha profesora asomada a fiestra, o corredor das aulas, a entrada aos seminarios. Tamén visitamos a biblioteca que na época da novela era a capela do instituto.


Logo camiñamos pola praza de España comparándoa coa vella, 


Nos achegamos a praza de Armas lembrando o posto de patatas e churros de Bonilla. 


Na praza de Amboage disfrutamos mirando a casa familiar do protagonista e narrador, una casa modernista de Rodolfo Ucha que aínda se conserva. 


Rematamos nas rúas do Esteiro, lugar doutras aventuras. Voltamos ao noso instituto, coñecendo mellor a cidade, tantas veces transitada, sabedores agora que a compartimos con artistas que la amosan nos seus textos e nas súas imaxes. 


martes, 4 de xuño de 2024

TEATRO NO IES SOFÍA CASANOVA

Ola rapaces!

Seguimos contándovos actividades feitas polos compañeiros neste final de curso. Agora falamos dunha obra de teatro escenificada polos rapaces de 1º de ESO do grupo de Teatro do Sofía dirixidos por Rosa e Marta.


A obra foi representada no Teatro Jofre ante os seus compañeiros e ante rapaces do IES Concepción Arenal. 

Tratábase dunha selección destas pezas teatrais: O Valo de Carlos Labraña, Mamasiña que medo de Chus Pereiro, Brinquemos o Teatro de Euloxio Ruibal, Carabela de Paula Carballeira, Unha estrela para Amina de Celia Díaz Núñez e Esceas de Fernando Soto.


Os nosos actores foron:

  • Mar: presentadora 
  • Lara: refuxiada
  • Sebas: soldado
  • Ada: Colombina
  • Gerard: Arlequino
  • Miguel: Pierrot
  • Noa: Amina
  • Inés: Sally
  • André: profesor 
  • Adrián: alumno
  • Laura, Alex e Antón: os tres youtubers 
  • Sabela: Carabela
  • Iria: nena de plástico 
  • Lois: Paxaro Choromicas
  • Álvaro: Peixe Mutante
  • Víctor: Morcego
  • Uxía: Celidonia
  • Aroa: Chincha
  • Lara: Chincheta
  • Matías: Mecánico


Parabéns, rapaces! Sodes uns artistas.





domingo, 2 de xuño de 2024

CONCURSO POESÍA E IMAXE 2024

Ola rapaces! Queremos compartir convosco os debuxos dos nosos alumnos que participaron no concurso anual do nostro Concello Poesía e Imaxe.


O gañador foi Eloy Fernández Núñez de 1º ESO C. Parabéns. Encántanos o teu deseño dun poema de Luisa Villalta!
 


Tamén queremos felicitar ás finalistas Lucía e Mara de 3º ESO C que se inspiraron nun poema en lingua maia e outro en lingua inglesa.



martes, 28 de maio de 2024

HOMENAXE A BENITO VICETTO

Ola rapaces! 

O alumnado de terceiro da ESO realizou o martes 21 de maio unha pequena homenaxe ao escritor, historiador, precursor do Rexurdimento e fillo predilecto de Ferrol Benito Vicetto Pérez, para conmemorar o bicentenario do seu nacemento.





O acto consistiu nun pequeno roteiro polos espazos vitais do autor: barrio de Esteiro, Teatro Jofre, Ferrol Vello. Finalmente leron ao pé da estatua do ilustre autor no Parque Raíña Sofía dous poemas escritos en galego. Tamén realizaron unha pequena ofrenda floral e remataron cantando o Himno galego.

A noticia saiu na prensa local. Podedes vela aquí.



Por outra banda, agora están confeccionando un mural urbano nas paredes do recinto escolar.

Parabéns!

mércores, 22 de maio de 2024

ENFRONTAMENTO ENTRE ANTÍGONA E CREONTE

Ola rapaces!

Aquí temos unha impactante estrea que compartimos na nosa biblio.



Os rapaces do Obradoiro de Escritura de 1º BAC co seu profesor Emilio Saldaña gravaron un resumo do estasimo primeiro da Antigona de Sofocles, realizada no escenario do salón de actos.

Tras a intervención do coro, Antigona e Creonte enfróntanse representando as leis divinas que obrigan a honrar aos defuntos e as políticas que buscan castigos exemplares aos traidores.

Os nosos actores son:

  • Antigona: Inés Díaz-Robles 
  • Creonte: Brais Hernández 
  • Guardián: Ainara Martínez 
  • Coro: 
    • Lía Aneiros 
    • Alba Bustabad 
    • Adriana Fernández 
    • Carmen Gestal 
  • Imaxe e son: Adriana e Brais

Parabéns!!

xoves, 16 de maio de 2024

SEMANA DAS LETRAS GALEGAS

Ola rapaces!

Rematando xa a Semana das Letras Galegas, vos resumimos aquí moitas das actividades que estamos levando a cabo, agasallando a nosa autora Luisa Villalta da que podedes ver un cartel na entrada do centro. 



O luns tivemos a visita de Andrea Maceiras, autora da que leron en 1º de ESO Alma de elefante, unha historia de crecemento e de amor aos animais.

O martes participamos no Festival das Letras no salón de actos con bailes e actuacións sobre as que vos contaremos máis adiante polo miúdo. 


O martes tivemos un estupendo roteiro en Mondoñedo cos rapaces de Literatura Universal e Antropoloxía de 1º de Bac. Visitamos a catedral, o seminario, a casa museo de Álvaro Cunqueiro, o cemiterio, a imprenta e o Pazo de san Isidro. Atendeunos Valentín, o campaneiro, e a noticia saiu en La Voz de Galicia 



O mércores acudiú Eva Mejuto e falou en 4º da ESO da súa  novela 22 segundos.



luns, 13 de maio de 2024

VISITA DE SANTIAGO GARCÍA CLAIRAC

Ola rapaces!

O día 30 de abril tivemos outro encontro literario na nosa biblioteca. Un grupo de alumnos e alumnas de terceiro da ESO leron a novela El principito se fue a la guerra de Santiago García Clairac.



 O autor veu a visitarnos e pasou connosco unha ora na que contestou todas as nostras demandas. Falou da súa carreira literaria que comezou logo de deixar o seu lavoro no eido da publicidade. Contounos a súa formación en Francia e como sempre soubo que querría escribir. 


Sobre a súa novela contounos a pegada que lle deixara a historia familiar na época da Resistencia, o amor que tiña pola obra de Antoine de Saint- Exupery, especialmente por El principito.


Logo de firmarnos algúns libros, os rapaces tornaron a clase, moi satisfeitos de ter coñecido a este interesante escritor ao que ningún deixou de preguntarlle algúnha cousa.

domingo, 5 de maio de 2024

POEMARIO. OS NOSOS POETAS

 Ola! 

Aquí deixámosche o poemario do noso I Concurso de poesía IES Sofía Casanova. 

Como estamos tan orgullosos de vós, non pretendemos achegar nada máis. 

Tan só unha recomendación. Busca un recuncho apracible, consegue silencio e le con tranquilidade para ti mesmo. 

Estamos seguros que che vas a emocionar!

POEMARIO.PDF






Por certo, La Voz de Galicia faise eco da noticia na edición do domingo. Podes lelo aquí. 

mércores, 1 de maio de 2024

CELEBRANDO O DÍA DO LIBRO. SEGUNDA PARTE

Como dicíamos na anterior entrada, esta semana tiñamos moitas actividades na biblioteca con motivo do Día do Libro. 

Aquí queremos falarvos do I Concurso de Poesía IES Sofía Casanova do que estamos a preparar un poemario cos gañadores e os accésit para compartir con todos o talento dos nosos rapaces.

O equipo de Biblioteca realmente quedou abraiado pola alta participación neste concurso. Tivemos máis de cen participantes, nas linguas galega, castelá, francesa, inglesa, latina e árabe. Costounos moito elixir os gañadores e os accésit, porque en tantos textos voaba o xenio da creatividade.


Aquí está o listaxe de premiados.

En lingua galega: 

1º ESO: 

“Non me gusta o meu poema” Mateo Crespo Piñeiro (1ºA) 

Accésit: “Nunha cadeira de madeira” Martín Pereira (1ºB) 

Accésit: “No xardín do corazón florece un amor” Pedro Mascaró (1ºA) 

2º ESO: 

“Poema dun amor primaveral” Sofía Bores Caruncho (2ºD)

3º - 4º ESO:

“O cadro da vida” Lara Prida Seoane (4ºA) 

“E que é a liberdade?” Hugo Alonso López (4ºB) 

En lingua castelá:

1º - 2º ESO: 

“Querer sin querer” Jimena Gómez Ramonde (2ºA) 

Accésit: “Mañanas de verano” Lara Freire Escribano (2ºB) 

3º- 4º ESO:

“Escasez de ideas” Adela Carrera Vergara (4ºB)

Accésit: “Descubriendo el mundo” Pablo Añón García (3ºC)

Accésit: “Un año” Xavier Díaz Bastida (4ºA) 

1º - 2º BACH: 

“Caminos del alma” Noa Gayoso Luaces (1ºA) 

Accésit: “Necesitamos otros cuentos” Inés Pita Rodríguez (1ºA) 

Accésit: “Vida” Ana María Jiménez Ezquerra (1ºA)

Accésit: “Ni los sueños sueños son” Miguel Trillo Valeiro (2ºB) 

Accésit: “Amor de verano” Marta Torres Gestal (2ºB) 

En lingua inglesa:

1º - 2º ESO: 

“Her: Fate” Sofía Bores Caruncho (2°D ESO) 

Accésit: “Weirds birds” Anne Oromendía Silva (2ºB ESO) 

En lingua árabe:

1º - 2º ESO: 

“Me preguntaron sobre algo que alivie la tristeza” Imane Kassimi Idrissi (1ºD) 

3º - 4º ESO: 

“Hay personas cuyas palabras no sirven de nada” Imane Maouard (4ºC) 

En lingua francesa: 

3º - 4º ESO: 

“Ma mère” Yassine Kassimi Idrissi (4ºC) 

“Parmi les nuages qui dansent” Noa Rodríguez Lamas (4ºC) 

1º - 2º BACH: 

“La mer verte” Antonio Rivero Mosquera (2ºB)

As cerimonias de premios foron moi fermosas. En primeiro lugar, todo o alumnado de 1º de ESO, que participou moi activamente, acudiu ao Salón de Actos onde Rosa conduciu a entrega de premios. Os gañadores sairon a recitar os seus poemas co acompañamento da música do piano de Iria Romera. 



Na biblioteca entregamos nunha segunda tanda os premios de 2º, 3º e 4º de ESO. Ata o momento non se soubo quen ián ser os gañadores e a sorpresa podíase notar no ambiente. Poidemos escoitar moitas linguas e moito sentimento no fogar das letras.


A última entrega de premios foi tamén na biblioteca cos participantes do Bacharelato. Tamén Iria acompañounos co seu piano. A madureza e a sensibilidade dos seus versos queda aínda nascosta polos andeis da nosa biblio.


Moitas grazas a todos os profes colaboradores e aos profes poetas, grazas tamén aos xurados. E sobre todo grazas aos rapaces talentosos que superastes o medo e abristes o voso corazón.


mércores, 24 de abril de 2024

CELEBRANDO O DÍA DO LIBRO. PRIMEIRA PARTE

Ola rapaces!

Estes días estamos a ter moitísimas actividades na biblio para celebrar o Día do Libro! Para que non se nos esquezan faremos un repaso.
O martes 23 fomos de excursión a facer un roteiro literario en Mondoñedo da man de Milca, paisana da cidade episcopal. Os alumnos de 4º de ESO visitamos a catedral, a casa de Cunqueiro, a imprenta. O día estivo precioso e alí nos trataron xenial.



Pola tarde do mesmo martes, tivemos a segunda sesión do noso café literario. Visitounos aos alumnos de bacharelato do Club de Novela Gráfica o escritor Xavier Alcalá, que nos falou da súa experiencia ao redactar A nosa cinza. Explicou o paso da novela a banda deseñada coa axuda do ilustrador Manel Craneo, que esta vez non puido vir connosco.



Asinounos diversos exemplais de Cinza e logo da charla, quedouse contándonos pequenas anécdotas.



O mércores 24 entregamos os premios do noso I Concurso de Poesía en diversas linguas. Pero deste emocionante evento... falaremos en vindeiras entradas.

mércores, 3 de abril de 2024

VISITA DE IRENE MONTEIRO

Ola rapaces!

O pasado 12 de marzo tivemos un café literario coa autora Irene Montero para falar da súa obra Lúa Nova.



O Club de Lectura de Novela Xuvenil na sección de 4º de BAC e de Bacharelato puido disfrutar desta conversa con Irene. O seu contiño, como ela di, relata unha fermosa historia de superación dunha rapaza cega, chamada Lúa Longoria, que acaba sendo unha gran pianista.



Logo da presentación por parte de Daniel, compañeiro e amigo da novelista dende a adolescencia, aproveitamos a tomar un refresco ou un café mentres comentabamos con Irene as nosas dúbidas e inquedanzas trala lectura. Irene contounos que se inspirou cando coñeceu a unha rapaza cega a quen non se pon ninguén por diante para acadar os seus soños.



Con grande agarimo a novelista firmounos varios exemplares da biblioteca e quedamos en chamala cando publique a súa vindeira novela.




domingo, 17 de marzo de 2024

O DÍA INTERNACIONAL DA MULLER E DA NENA NA CIENCIA E DÍA INTERNACIONAL DA MULLER TRABALLADORA

Ola rapaces!

Para celebrar o 11F, Día Internacional da Muller e da Nena na Ciencia, e o 8M, Día da Muller Traballadora, desenvolvéronse diversas actividades de distintos departamentos no noso instituto.

Desde o Departamento de Orientación e desde a Biblioteca, ademais de colgar algúns cadros da nosa futura exposición permanente sobre Mulleres Científicas, pediramos a colaboración de todos os departamentos e en especial dos titores da ESO para a realización dunha serie de carteis para expoñer polos corredores do centro. O noso obxectivo era profundizar cos rapaces sobre mulleres esquecidas, pero que foron significativas na arte, no deporte, na ciencia, na literatura, etc

.


Moitos alumnos realizaron carteis que decoran o centro. Por exemplo, con María Lanza  os terceiros da ESO traballaron en pintoras como Sonia Delaunay, Maruja Mallo, Natalia Goncharova, etc. Outros cursos traballaron outras mulleres salientables: matemáticas como Maryam Mirzakhani, científicas como Rosalind Elsie Franklin, etc. 


En Literatura Universal escolleron escritoras que tiveron que loitar con moita enerxía para ser recoñecidas en épocas moi diferentes como Jane Austen, Mary Shelley, Karen Blixen, Toni Morrison, etc. Algunhas como Virginia Woolf reflexionaron sobre o rol da muller e os seus dereitos e convertéronse en pioneiras do feminismo. 



En primeiro de BAC, na clase de Lingua e Literatura Castelá con Pilar, seleccionaron escritoras españolas do Século de Ouro moi esquecidas, como Beatriz Bernal, autora dunha novela de caballerías, Ana Caro que estrenou obras en corrais de comedias, así como a propia filla do Fénix dos Inxenios, sor Marcela da Cruz. 

Profesoras do Departamento de Lingua Galega, como Rosa e Pili, decoraron a parte central da entrada do centro, adicándose especialmente a carteis sobre escritoras galegas, especialmente as poetas como Luisa Villalta, Lupe Gómez, Chus Pato ou Iolanda Castaño.



María José do Departamento de Filosofía no Proxecto Competencial con 4º B e C gravou un vídeo que se colgou na pantalla da entrada “8M: sen mascara" facendo fincapé en mulleres ferrolás como Ánxeles Alvariño, Ánxela Ruiz.



Pola súa banda, para a materia de Proxecto Competencial, Paula de Educación Física traballou sobre mulleres deportistas e Olga de TIC cos alumnos de 1º BAC D fixo un vídeo xenial. Tédelo aquí, con referencias aos logros de Ana Peleteiro, Alexia Putellas, Ona Carbonell, etc, Tedelo aquí. 





Por último, María do Departamento de Educación Plástica, está facendo unha acción artística colaborativa cos pequenos de 1º ESO ao estilo de Yayoi Kusama. Con esta performance tratan de visibilizar os nomes de mulleres artistas inxustamente esquecidas pola historia da arte, a pesares do gran valor da súa obra e do recoñecemento que algunhas tiveron na súa época. Colaboran tamén os alumnos de 3º de EPVA e calqueira que queira participar. Apúntasche? 





Grazas a todos pola vosa colaboración!


venres, 8 de marzo de 2024

CELEBRACIÓN DO DÍA DE ROSALÍA

Ola rapaces! 

Para conmemorar o aniversario do nacemento da nosa poeta o venres 23 de febreiro dúas alumnas de 4º da ESO, Inés Perez e Inés Santalla, musicaron con voz e violonchelo tres poemas de Rosalía: "Alborada", "Daquelas que cantan" e "No ceo azul crarísimo".

Como pano de fondo para a actuación alumnos e alumnas de 1º, 2º e 3º prepararon un mural con motivos biográficos da autora e versos dos seus poemas. Especialmente fermoso foi o xogo de palabras coa rosa e as letras "lía".



Ademais algúns rapaces de 2º e 3º prepararon vídeos recitando poemas da súa obra.





Aquí tedes algúns vídeos das cancións das dúas Inés.




Que beleza que todas as artes conflúan, conmemorando a nosa gran poeta!