mércores, 24 de xuño de 2015

CONCURSO MARCAPÁXINAS LG 2015


Un ano máis, o concurso dos marcapáxinas Letras Galegas. Tras o reconto, estes foron os máis votados polos alumnos. 

1º: Névia Lamas. 2º: Xiana (4º C). 3º: Cristina (4º C).


Parabéns. Así rematamos o curso 2014-2015, e así comezaremos o 2015-16, coa entrega destes marcapáxinas. Pero para iso aínda queda moito! 

Bo verán, entre xílgaros, sereas e barcas...



luns, 22 de xuño de 2015

AS TRES GRACIAS NO SOFÍA

O venres 19 de xuño entregáronse os premios ás versións máis votadas de "As tres gracias". Continúa un ano máis "ExpresArte: Ver-Ler un cadro", na liña de "As venus" e "As meninas: ReciclArte".

1º premio: Raquel Toja Quintela por "As hero-gracias".
2º premio: Míriam Hidalgo por "Os gardiáns dos elementos".
3º premio: Marta Fernández Arias por "As tres graciosas".



Accésits: Claudia González. Daniel Aguiar. Cristina Lorenzo. Vid. muro.

Podedes ver no noso punto de encontro o que deu de si esta actividade: entrade no muro colaborativo e accederedes a cada unha das versións coa correspondente análise (título, estilo e interpretación).


mércores, 17 de xuño de 2015

KIM EN 1º ESO: ITINERARIO KIPLING, 150 ANOS



Autores: Alumnos de 1º A, EPV



Autores: Alumnos de 1º ESO, LLC


Rudyard Kipling (Bombay, 30-12-1865 / Londres, 18-1-1936) cumpriría 150 anos neste 2015. Coñecédelo por ser o autor de The Jungle Book (O libro da selva) e "If", entre outras moitas obras. Os alumnos de 1º ESO tráenvos agora a versión en cómic de Kim -novela de Kipling- así como o muro colaborativo onde foron colgando os seus traballos sobre este autor e a súa obra.  
Parabéns aos rapaces de 1º ESO e ás súas profesoras de EPV e LLC (María Lanza e Juana Brañas). Non queremos dicir moito porque preferimos que vexades o que fixeron os alumnos nos enlaces ao cómic e ao muro: merece a pena entrar neles se queredes acceder ao mundo de Kipling, se queredes acceder a un itinerario lector (Kipling, a literatura inglesa na India colonial, os clásicos levados a banda deseñada...) que vos pode guiar nas vosas lecturas de verán. 

https://sites.google.com/site/kiplingnosofia/


martes, 16 de xuño de 2015

TARTAS LITERARIAS CLUB DE LECTURA 2015

Martes, 16 de xuño. Como todos os anos, as tartas do club de lectura. Algunhas delas, neste enlace.


Si. Comemos ao pobre Obélix. Era unha galleta.
El tamén a comería... Estaba boísima.


Que comen os coellos? Cenorias, non?
Unha exquisita tarta de cenoria co coello branco de Alicia. 


Máis no enlace mencionado.

luns, 15 de xuño de 2015

AS MENINAS DE CANIDO CHEGAN A MONTMARTRE

Sábado, 13 de xuño 2015: La Voz de Galicia. Pois si. Un paso máis. O consello de administración da asociación Eau et Lumiere aprobou onte en París solicitar á Comisión Europea a inclusión das Meninas de Canido na rede de Itinerarios Culturais Europeos (en España, o Camiño de Santiago, a ruta do Quixote) da Ruta dos Impresionistas. Eduardo Hermida entrou onte no consello da asociación europea, e presentou a idea en Montmartre. Parece que (vid. Carlos Agulló, enviado especial a París de La Voz de Galicia) a recuperación deste espazo impactou aos expertos franceses. 
Amplía imaxe
Na Biblioteca do Sofía estamos felices. Desde que María Lanza e os seus alumnos de EPV nos deron a coñecer esta iniciativa -eles xa estiveran alí, participando-, entre todos vimos que era algo que merecía a pena: por iso ReciclArte e LiteraturizArte (vid. dentro do sitio a exposición ReciclArte, como se fixo, e a guía de lectura Meninas). Por iso estivo connosco Eduardo Hermida. E por iso desde o Sofía -e para o que teñades nunha aplicación do móbil- se está a traballar en:

O ROTEIRO DAS MENINAS DE CANIDO
Proximamente 

Seguiremos informando, pero aí vos vai un adianto.
Parabéns, Eduardo. Parabéns a todos os que participan neste movemento/revolución cultural en que se convertiu as Meninas de Canido. Ás veces, as árbores medran contra todo e a pesar de todo; ás veces nace arte no lugar máis insospeitado. Ás veces. Pero si, é posible. Coma vós, nós cremos que é posible. Que todo é posible. Con ganas, con traballo, con criterio... É posible. 

xoves, 4 de xuño de 2015

PLANETA LINGUA Nº 16: SOFÍA CASANOVA, OS PRIMEIROS 50 ANOS

Xa hai uns días que está connosco o novo número da revista Planeta Lingua, revista promovida polo Equipo de Dinamización de Lingua Galega.  Andamos mal de tempo, queriamos contalo ben, pero xa é moita hora de dicilo. Así que vai como vai. Pero vai: 

Antía, superácheste. 

Antía Aneiros, María Rodríguez Brañas, Tomás Losada 
e Carlos Bértalo lendo Planeta Lingua 16. 

Sempre nos sorprendes, pero desta vez… Mirade os contidos: seguro que as vosas nais ou avoas foron alumnas do centro, seguro que lles encantará revivir de novo aqueles anos. Mirade, mirade:
  • “Tal como éramos”, o Ferrol que veu nacer o noso instituto:  Que fotos!.
  • “Os primeiros 50 anos”,  o Sofía de 1963-64 a 2013-14, con datas fundamentais: 1963 (bota a andar), 1967 (novo edificio), 1970 (cambios), 1976 (BUP), 1983-1985 (de Camilo a Sofía, de feminino a mixto), 1996-97 (a ESO)…
  • “Sofía Casanova. A traxedia de Europa feita palabra”, con fotos e anécdotas, moitas delas contadas a Antía polos alumnos Carlos Bértalo, Antía Aneiros, Tomás Losada e María Rodríguez Brañas.
  • “Eu estudei no Sofía Casanova” , unha reveladora charla con María José Rodríguez Bouza, ata hai nada profesora de EF no centro.
  • “As miñas lembranzas do instituto” por Ánxela Loureiro. Que memoria! Que recordos! Que ben o contas! “A prepa”, dona Socorrito, o movemento estudantil… Lédeo, por favor. Lédeo.
  • Os actos de celebración dos 50 anos. Por certo, aí vai o enlace ao documental realizado por alumnos e profesores, cos nosos amigos de Gaitafilms.
  • Sofía Casanova, “Ferrolán do ano”, co discurso de agradecemento de Laura, a directora.
  • E as achegas da ANPA e de Alberto Fuentes, antigo alumno do Sofía e actual xefe de estudos.

Antía, parabéns. É unha revista para todos, para os que estiveron, para os que estamos e para os que estarán. Porque os 50 anos do instituto non se podían esquecer. Porque é algo que non pasa todos os anos. Porque se traballou moito nesta conmemoración. E porque ti traballaches moito. E este é o resultado. Un fantástico resultado.

Continúa, por favor. Todos os anos recolles feitos que nos fan lembrar o que fomos e o que somos. Que este noso Planeta Lingua dure "mil primaveras máis", e que sexa da túa man. Fasnos moita falta, fasnos recordar, porque...





Jose Saramago (Azinhaga, 1922-Lanzarote, 2010)
Premio Nobel de Literatura, 1998
  

martes, 2 de xuño de 2015

EL CORREDOR DEL LABERINTO


Hoxe sesión El corredor del laberinto con Antía Casal e Míriam Hidalgo: sinopse obra, trailers películas, páxina oficial James Dushner. Preguntas: Para que vale o labirinto? É suficiente ver a película? Canto tempo vos levou facer o traballo? Gustouvos o libro? Aplausos. 


"A hora de Diego”: banda deseñada. Recomendacións: Groo y Rufferto (parte “tonta” de Conan); La tumba de Drácula (de Marvel); Scott Pilgrim (película, enlace). Diego recomenda estes libros nesta orde.
Remataron sesións este curso? Tartas literarias? 
Brevidade obrigada por fin de curso. 

mércores, 27 de maio de 2015

NEIRA VILAS RECUPÉRASE!

Así, ben grande. Porque nos alegramos. Moito. Porque tiñan razón os alumnos de 1º ESO C e Laura, a súa profesora: Neira Vilas recupérase na casa. Sabedes que estaba previsto que conectase con nós por Skype na semana das Letras Galegas, pero tivo que ingresar no hospital. E agora, aínda en recuperación, contesta ao correo que os alumnos de Laura enviaron. Por certo, Ana o único que fixo foi servir de intermediaria a través da Biblioteca (enviou o correo de Laura á Fundación Neira Vilas). Parabéns, a seguir así, recuperándose. E graciñas, Xosé, por acordarse de nós. Cuídese moito! Moito, moito!




mércores, 20 de maio de 2015

ITINERARIO LETRAS GALEGAS 2015: PONTEVEDRA-CAMBADOS.

  • 2015, Letras Galegas Filgueira Valverde.
  • 2015, 100 anos de Vento mareiro, poemario de Cabanillas. 

A conexión:
  • Filgueira Valverde: relación co Museo de Pontevedra.
  • Vento mareiro, augada de Castelao que ilustrou o poemario Vento mareiro de Cabanillas, está no Museo de Pontevedra.




Entón...

Continuamos as actividades do "Mes das Letras no Sofía" con esta viaxe cultural que nos leva a Pontevedra para ver no Museo da cidade -tan ligado a Filgueira Valverde e Castelao-, a exposición sobre Filgueira Valverde e a sala Castelao, e saír logo ás rúas seguindo o roteiro "A Pontevedra de Castelao". Despois percorreremos "O Cambados de Cabanillas" para conmemorar os 100 anos de Vento mareiro (Cabanillas: 1915). E como fondo, como un "vento mareiro", eses poemas de Cabanillas (podes ver aquí unha selección) e esa augada de Castelao ubicada hoxe no Museo de Pontevedra: recordade que Vento mareiro, o cadro de Castelao, serviu no seu momento para ilustrar a portada da obra de Cabanillas do mesmo nome.

Castelao: Vento mareiro. Augada, 1921. Museo de Pontevedra.



Pretendemos aproveitar esta actividade para que os alumnos fagan un uso responsable do móbil como ferramenta de consulta, busca, captación e transmisión de información. Para facilitar o labor, deseñouse o sitio informativo itinerarioletrasgalegas2015, que servirá como punto de partida da actividade; inclúe información básica, tríptico, planos e uns itinerarios ("A Pontevedra de Castelao" e "O Cambados de Cabanillas") que os alumnos terán que completar tras a visita.


O sitio tal como se vería no móbil

venres, 15 de maio de 2015

ENCONTRO CON XAVIER ALCALÁ II: LER NA ERA DIXITAL / ENTREVISTA

Ben. Información procesada. 17 de maio: Día das Letras Galegas, Día da Sociedade da Información e das Telecomunicacións. Xavier Alcalá: escritor e enxeñeiro de telecomunicacións. Pensabamos achegar aquí o que comentou Xavier Alcalá o martes 12, pero non. Decididamente, non. É mellor que o escoitedes a el, coas súas propias palabras. En breve teremos editado o vídeo e poderedes velo nesta mesma entrada. Procede, iso si, que apuntemos algunhas das cuestións que tratou Xavier Alcalá en "Ler na era dixital". Algunha vez vos preguntastes...
  • Como chegou un escritor vocacional a Enxeñería de Telecomunicacións?
  • É correcto, na sociedade da información globalizada, separar ciencias e letras?
  • Estamos na era dixital. Que cambiou con respecto á anterior? Como cambiou?
  • Falamos ou fabulamos? Desaparecerá a literatura?  Está en crise o sistema literario? Realmente? Ata que punto? E que hai da autopublicación?   
  • Hai traballo no campo da Telemática? Pode ser divertido o traballo de captación, procesado e difusión da información?
  • É importante ler? Por que? Para que? Que ler?
  • É importante redactar correctamente? Por que? Para que?
  • Que soportes lectores se utilizan actualmente?
  • Para escribir na era dixital, hai que escribir doutra maneira?
Se algunha vez vos fixestes algunha destas preguntas, tede por seguro que Xavier Alcalá as contesta en "Ler na era dixital".

E recordade:

“Nunca chegaredes a nada se non ledes moito”.
Xavier Alcalá dixit, aquí, no Sofía, o 12-5-2015.


E chegou o momento da entrevista: "Irene Alcalá entrevista a Xavier Alcalá". Pois o mesmo de antes: mellor coas súas palabras (poderedes ver aquí o vídeo). Pero adiantamos as preguntas de Irene (á persoa e ao escritor; faltou tempo de preguntar ao enxeñeiro de telecomunicacións):
  • Que recordas do ano 1963 (ano en que nace o “Feminino” (actual Sofía Casanova) separándose do “Masculino” (o instituto de A nosa cinza)?
  • Que hai de autobiográfico en A nosa cinza?
  • Escribir en galego na época franquista, facer letras de cancións… Por que? Tiveches problemas?
  • Que significaron para ti estes lugares? O areal de Cabanas; Ferrol; América, Arxentina, A Patagonia.
  • E estas persoas? Ramón Piñeiro e Andrés do Barro.

O lector / escritor. 

  • Cóntanos.  Coñeciches moitos escritores? 
  • Como escribes? Por que? Que é o "laboratorio"?
  • Que significan para ti estes nomes? As chisterías de Ferrol, O Capitán Trueno, Xulio Verne, Salgari. Os clásicos da literatura española, os libros das aventuras amazónicas brasileiras. Eça de Queiroz. George Orwell. A literatura arxentina. A literatura de viaxes. A literatura con toques científicos.
  • Que che queda por contar?
  • Qué opinas do uso do móbil nas aulas?
Ao enxeñeiro de telecomunicacións (que fai e le ciencia), quedounos por preguntar…
  • Por que un enxeñeiro de telecomunicacións decide ser profesor?
  • É posible facer ciencia en galego?
  • Cantas linguas utilizas?
  • Serviuche o galego para aprender outras linguas?
  • Como ves o futuro do galego?
  • E para rematar, que pregunta non che fixeron e che gustaría que che fixeran? 
Outro día preguntaremos...

martes, 12 de maio de 2015

ENCONTRO CON XAVIER ALCALÁ


O próximo domingo, 17 de maio, é o Día das Letras Galegas e o Día Mundial da Sociedade da Información e das Telecomunicacións. Hoxe, 12 de maio, estivo connosco Xavier Alcalá, escritor e enxeñeiro de telecomunicacións. Hoxe coñecemos un home sabio, bo e xeneroso. Sabémolo polas súas palabras. Nós non as temos, non as suficientes. Poderiamos contarvos o que lles dixo aos alumnos no salón de actos (encontro "Ler na era dixital"). Poderiamos escribir o que respondeu na entrevista que se lle fixo na Biblioteca ("Irene Alcalá entrevista a Xavier Alcalá"). Pero temos que procesar a información, moita información e de gran valor. Así que -de momento- só adiantamos o cartel co código QR do sitio xavieralcalanosofia (onde incluiremos as actividades de hoxe) e o "Roteiro polo Ferrol de A nosa cinza" no que están a traballar Laura Suárez Llano e os seus alumnos. De momento...


Xavier Alcalá, Irene e Roberto na Biblioteca do Sofía, 12-5-2015

Parabéns a Irene e a Roberto. Graciñas, Irene, polo traballo e pola entrevista. E graciñas, Xavier, pola túa xenerosidade e entrega, por compartir con nós moito do que sabes. Por contárnolo. Por ser. Por estar. Por todo. 





  

mércores, 6 de maio de 2015

BANDA DESEÑADA: CONTINÚA...


Na entrada anterior, a nosa cincuentona favorita, Mafalda, advertía: "Continuará". E continúa. 

Segue o itinerario banda deseñada e chega agora o tríptico "Lemos cómic" coas recomendacións de Diego Pereda, Cecilia Ramil e Emilio Saldaña, as frases seleccionadas de Mafalda e a contribución de Laura e María (Nómades: Club de lectura). Podes velo neste enlace ou tamén -se a vista cho permite- a continuación.




Socas! Xa o sabemos, que si, que este é o teu sitio, a túa biblioteca. Sabemos que estás, sempre estás aínda que non fales. Ti es a alma da Bibliotecasofía. Pero tes que comprendelo: hai momentos en que tes que adicarte a facer o que mellor fas, mergullarte nos libros que che dan vida e deixar que traballen outros... Deixa que falen Mafalda, Astérix, Mortadelo, Sasha, Tintín, o Capitán Trueno, Sir Tim O´Theo, Carpanta, Batman, Superman, Spiderman, El Jabato, Capitán América, Wonder Woman, Scott Pilgrim, Ramona Flowers, mesmo Joker, Lex Luthor, Pingüino e tantos outros... E ti, a ler; dicía Xavier Alcalá citando a un Menéndez Pidal xa velliño:

"Ai, que pena, ter que morrer, habendo tanto libro por ler". 

Pois iso. Por certo, Xavier Alcalá estará o martes, 12 de maio, no Sofía. Pero esa é outra historia que -tamén- continuará na Bibliotecasofía.  







venres, 1 de maio de 2015

ENCONTRO CON XOSÉ TOMÁS. ITINERARIO BANDA DESEÑADA.

O martes 28 de abril, no marco das actividades do “Mes das Letras no Sofía”, estivo connosco Xosé Tomás.

Primeiro reuniuse cos seus lectores, os membros do Club de Lectura, para comentar Nómades.



Con todo detalle explicou o proceso de elaboración e creación e puidemos ver os seus cadernos coas notas e imaxes que foron dando forma a Nómades. Por que unha historia de mulleres e de emigración? Dous anos estivo apuntando ideas en pouco espazo (tiña que adaptarse ao que logo sería o formato de banda deseñada) e deseñando pequenos bocetos que reflectisen os trazos principais -unha parte que define como “un sufrimento”- necesario para pasar logo á parte “divertida”, a ilustración. Puidemos ver as ilustracións orixinais de Nómades, fantásticas, cheas de forza, feitas a lapis e logo escaneadas e coloreadas no ordenador, un traballo –este último- que Xosé Tomás 
cualificou de “artesanal”.



Pasou logo a relatar anécdotas das mulleres ás que deu forma en Nómades: Fátima, unha historia real, Sasha, Ghalia… E con el puidemos reflexionar sobre o feito de ser ou sentirse “nómade”, sen hogar, diferente, sobre os valores –ou  a falta de valores- humanos… Pode que sexa verdade que unha imaxe vale máis que mil palabras: relede Nómades, volvede ao libro e mirade esas caras, pensade como se senten… E seguro que non moi lonxe hai alguén moi similar aos personaxes deste libro. Non esquezades a cita de J. Donne con que Hemingway comeza Por quen dobran as campás:
Ninguén é unha illa, completo en si mesmo; cada home é un pedazo de continente, unha parte da terra; se o mar leva unha porción de terra, toda Europa queda disminuída, coma se fose un promontorio, ou a casa dun dos teus amigos, ou a túa propia. A morte de calquera home redúceme porque estou ligado á humanidade; polo tanto nunca preguntes por quen dobran as campás: dobran por ti.


Despois do encontro co Club de Lectura, Xosé Tomás impartiu un obradoiro sobre banda deseñada a un grupo de alumnos de 3º ESO que estaban acompañados da súa profesora de EPV,  María Lanza.



A denominación… Cómic? Banda deseñada? Novela gráfica? Outras? Quedámonos con banda deseñada ou novela gráfica, tras descartar outras opcións. Presentounos a Yellow Kid, o primeiro personaxe “oficial” de banda deseñada (1895), para pasar á relación cine-banda deseñada (paralelos tamén no seu nacemento) e entrar xa no que é o deseño de personaxes, os planos, os diálogos, a localización… Fíxonos reparar na importancia dos silencios e no feito de que para ler banda deseñada, para apreciala, hai que coñecer (e recoñecer) os seus códigos. Veu logo a viñeta, a experimentación coa viñeta, as onomatopeias, as liñas cinéticas, o globo (bocadillo) e o delta… E niso estabamos cando recordamos aquelas miniaturas medievais de T.L.M. que “rescatamos” polo Día da Árbore e as das Cantigas de Santa María que rotulan a nosa biblioteca. 

Toda unha lección, a de Xosé Tomás, que despois os alumnos tiveron que poñer en práctica, e que parece que continuará na clase de Debuxo con María Lanza… De ser así, seguiremos informando.



Graciñas, Tomás, por estar connosco, pola túa xenerosidade, por facer o que fas e por ser como es.




Non remata aquí o noso “Itinerario banda deseñada”, hai máis. Xa vos contaremos. De momento, visitade a Biblioteca: 
  • Os fondos de banda deseñada saíron do seu curruncho para ocupar lugares máis visibles. 
  • Reparastes na contribución dos alumnos de 1º ESO A e B con material sobre Mafalda? Porque aí comezou todo: recordade que Mafalda cumpriu 50 anos neste curso académico, o 29 de setembro de 2014.  Celebrámolo, aínda o seguimos celebrando e máis que o imos celebrar. De feito, Mafalda comezou este “Itinerario banda deseñada”, que…







MES DAS LETRAS NO SOFÍA


O Equipo de Biblioteca do IES Sofía Casanova decidiu adicar un mes ás letras no Sofía e… Que mellor que as datas comprendidas entre o 23 de abril (Día do Libro) e 17 de maio (Día das Letras Galegas) para facelo? Pois niso estamos…


Non tedes máis que ver o cartel: obradoiro con Xosé Tomás o 28 de abril, encontro con Xavier Alcalá o 12 de maio, itinerarios lectores, autores e obras que “cumpren anos”… Desexamos desde aquí a Neira Vilas que siga mellorando: a semana do 23 de abril ía falarnos da súa vida e dos seus encontros con tantos e tantos persoeiros do século XX (conexión por Skype) pero está recuperándose dunha doenza; non deixedes de ler este fragmento da carta que lle enviaron os alumnos de 1º ESO C:
Querido Xosé, dende aquí queremos darche unha aperta. Sobreviviches á Guerra Civil, isto non é nada. (...) 
Comezamos o MES DAS LETRAS co itinerario A metamorfose, 100 anos: encontro dos clubs de lectura, o do "Feminino" e o do "Masculino", os dous institutos xuntos de novo 50 anos despois da súa "dramática separación". O 23 de abril entregáronse os premios dos relatos "Personaxes do bosque", o tríptico ALFIN5 Sofía, as pegatinas-calendario cos itinerarios lectores "Cumpren anos"... 

Itinerario lector "Personaxes do bosque": relatos e ilustracións. Premiados no concurso.

Calendario "Cumpren anos": Itinerarios lectores Quixote II, Emma,  Alicia, A Metamorfose, Vento mareiro,
Dante, Teresa de Ávila, Kipling, Yeats, Ramón Piñeiro, Álvarez Blázquez. 

Se non o estades facendo xa, ¿queredes participar nalgún dos itinerarios lectores? Vide á Biblioteca do Sofía e seredes informados.


xoves, 23 de abril de 2015

VISITANDO A BIBLIOTECA DO IES CONCEPCIÓN ARENAL

Ola rapaces! O pasado martes puiden saír por un tempiño do meu amado recuncho na nosa biblioteca para visitar con vós o que eu considero "a miña casa nai", a Biblioteca Saturnino Hermida do IES Concepción Arenal. 
Mentres eu percorría cos meus curmáns aquela biblioteca tan chea de historia, pareceume o marco idóneo para falar dunha obra mestra da literatura universal que cumpre cen anos A Metamorfose de Franz Kafka. Decateime de que para algúns a historia de Gregor Samsa metamorfoseado nese escaravello xigante viña sendo un pouco difícil, pero pronto Emilio e Ana botáronvos unha man para entendela mellor. Dende logo fixestes que me sentira moi ledo de vós tanto da presentación de Alicia e Álex, como do famoso itinerario de banda deseñada de Diego. 



Os dous grupos case ao completo
Alicia e Álex, antes da presentación.

Pero, por se se vos segue resistindo esta obra de Kafka, mirade estas novas adquisicións: o cómic de Peter Kuper e Kakfa de Robert Crumb, recomendados ambos pola libreria Kómic, de Santiago.

Penso que a experiencia pagou a pena. Que positivo é facer estas sesións conxuntas de ambos Clubs de Lectura!  É unha fermosa maneira de tomar contacto con rapaces doutros centros!

E agora, por suposto, tócanos a nós corresponder en maio á súa invitación e agasallalos do mesmo xeito. E a lectura que propoñemos vai ser El corredor del laberinto de James Dashner.