mércores, 13 de novembro de 2019

LENDO RELATOS DE MEDO NO SAMAÍN

Ola rapaces e rapazas!
Onte pola tarde tivo lugar na biblioteca unha sesión de lectura moi especial,  que xa tiñamos programada, tal como rezaba o noso cartel “Contos de medo”. Decidimos empregar textos de Edgar Allan Poe, aproveitando que este ano é o 170 aniversario do seu pasamento. Queremos deste xeito facerlle unha pequena homenaxe a un dos autores favoritos de moitos lectores do noso centro. 
Coa intención de sorprender aos rapaces e rapazas, puxemos velas e libros do escritor nunha mesa no centro da estancia coas luces apagadas, de xeito que todo parecía o máis fantasmagórico posible. O alumnado de 1º da ESO entraba expectante pola teatralidade do momento, cando de súpeto, mentres estaban acomodándose, víronse interrompidos por un ser que ocultaba o seu rostro baixo unha túnica branca con rachaduras, coma se acabase de saír da procesión da Santa Compaña. Se ben é certo que enseguida souberon que se trataba da profesora de Galego; Pilar, que é a mente detrás destas iniciativas de dinamización.



Tiñamos preparada unha presentación coa que se ía ilustrando a lectura da “Máscara da morte Vermella”, ó tempo que a profesora lía o relato en voz alta, poñéndolle toda a paixón e o misterio que o momento precisaba.

Imaxinades que lles resultou unha sesión entretida, e estades no certo, pero ademais, pretendiamos chamar a atención sobre a importancia do modelo lector. Para que os rapaces teñan oportunidades  de aprender dun lector adulto. 

Por suposto, tamén participou algún voluntario lendo outros contos terroríficos de varios autores. 



Deixamos una pequena lembranza desta sesión ó pé da nosa árbore do Samaín na biblioteca.



Tamén vos queda a presentación con fotos do evento.

venres, 8 de novembro de 2019

SAMAÍN 2019

Ola a rapaces!

Este ano para celebrar o Samaín, coma no curso pasado, colaborando co Equipo de Dinamización Lingüística do centro, fixemos unha proposta de actividades que van desde un concurso de relatos de medo, misterio e terror, ata a celebración de obradoiros do Samaín  o martes, día 5 pola tarde, co alumando de 1º da ESO.

Para continuar coa tradición  desta festa celta, fixemos en primeiro lugar un concurso de decoración de cabazas, cos elementos que trouxeron os nenos e nenas que quixeron participar. Estaban todas fantásticas e para que todos poidan admiralas puxemos unha pequena exposición na entrada do centro.
En sucesivas entradas deste blog informaremos sobre o fallo dos xurados para premiar este concurso e o de relatos.
Na biblioteca quixemos dar opcións ós rapaces e rapazas que non trouxeron cabazas pero que desexaban participar da festa. Programamos distintos obradoiros de creación de cabazas de papel, de confección de libros en forma de follas, cabazas e castañas. Neles os nenos ían poñendo refráns, cantigas, poemas ou adiviñas relacionadas co tempo e os froitos do outono, ou co Samaín. Tamén tiñamos preparados obradoiros para facer elementos decorativos cos que fixemos o noso cartel de Samaín da biblioteca e adornouse a entrada da biblioteca e a do instituto.


O grande mural que está na biblioteca conta ademais cunha selección de libros de medo e terror, en castelán e galego, para un abano amplo de gustos e idades, que esperamos inciten ó noso alumnado a seguir lendo.

   Así mesmo, colgamos algúnha das obras saídas dos obradoiros, de xeito que podedes leer refráns, cantigas, poemas e adiviñas sobre este tempo de festa no outono.


Foi unha xornada moi intensa e entretida pero temos que agradecer a colaboración de todos os nenos e nenas participantes e dos profesores que tiñan clase na tarde con eles. Da xefa do Departamento de Orientación; Paz, que estivo pendente da integración dos rapaces con algunha dificultade. Da Xefa do Equipo de Dinamización; Pili, que estivo a cargo da actividade. E non podemos esquecer a Antía que sempre nos sorprende coas súas decoracións.                                   

Para rematar, queremos  agradecer tamén ás nais do ANPA, que sempre están dispostas a axudar en todas as acitividades que se programan desde o centro. Graciñas a todos e todas.
 Desexamos que vos animedes a seguir participando destas actividades complementarias coas que tentamos poñervos en contacto con novas lecturas.
Aquí deixamos unha presentación na que podedes ver algúnhas fotos da xornada.

luns, 28 de outubro de 2019

CELEBRANDO O DÍA DA BIBLIOTECA COS MAIORES

Ola a todos! Como o prometido é débeda, temos que falar aquí da actividade do pasado mércores, no que o grupo de voluntariado, máis grande que nunca, reuniuse para celebrar cos maiores o Día da Biblioteca.
Temos que dar a benvida a un montón de xente nova: ás catro rapazas de 2º B, aos de 3º, ás 3 de 4º, ás dúas de 1º de BAC, e por suposto, agradecer a todos os veteráns que sexan tan fieis coma sempre.
Os preparativos da actividade foron como sempre: almorzamos xuntos e aproveitamos para presentarnos e falar da distinción do Selo de Bibliotecas Escolares Solidarias. 
        Logo repartimos tarefas. Uns ensaiamos os textos de Jorge Luis Borges; outros cortamos plumas para a maqueta das ás que levamos. Coas ás queríamos representar a idea que contén a frase de Borges sobre a lectura como forma de voo.

O tempo que estivemos cos maiores pasou moi deprisa. Andrea fixo as presentacións. Alba, Nerea, Paula, Alba, Lucía e Catuxa leron os textos. O resto axudamos aos anciáns coas súas plumas. Cada un puxo o que quixo nela: uns os seus nomes, outros os seus libros favoritos. 
Todos charlamos con eles. 
E así pasou a nosa primeira sesión do voluntariado externo deste curso. 
Grazas a todos por vir! Vémonos na vindeira!

xoves, 24 de outubro de 2019

24 DE OUTUBRO DÍA DA BIBLIOTECA

Ola rapaces!
Hoxe 24 de outubro celébrase en todo o mundo o Día Internacional da Biblioteca. E, como non podía ser doutra maneira, desde aquí querémolo lembrar.
Debo recoñecer que non sabía o motivo desta data, por que o 24 de outubro e non calqueira outro día? Dende cando se viña celebrando?
Internet veu no meu auxilio, documenteime e así volo conto. En 1992 resulta que foi queimada a Biblioteca Nacional de Sarajevo, no marco do terrible conflito dos Balcáns. Neste incendio perdiuse non soamente uns milleiros de follas, constituiu un auténtico memoricidio. A imaxe do músico Vedran Smailovi tocando o violonchelo entre os escombros do fermoso edificio quedou como símbolo desta sinrazón. Por iso, dende o ano 1997, cada 24 de outubro celebramos en todo o mundo o Día Internacional da Biblioteca.
Nosoutros quixemolo celebrar cos maiores da residencia DomusVi, pero desto falaremos outro día. 

O ano pasado unimos esta celebración á figura do escritor Federico García Lorca e tomamos as súas palabras do discurso de inauguración da Biblioteca do seu pobo Fuentevaqueros.
Este ano, aproveitando o 120 aniversario do seu nacemento, collimos prestadas as palabras de Jorge Luis Borges nun artigo de EL PAÍS (9-X1985). Aquí deixamos unha imaxe do cartel que vai adornar os corredores do instituto:
"Hay quienes no pueden imaginar un mundo sin pájaros; hay quienes no pueden imaginar un mundo sin agua; en  lo que a mí se refiere, soy incapaz de imaginar un mundo sin libros".


mércores, 23 de outubro de 2019

DÍAS DAS BIBLIOTECAS

Ola rapaces!

O 24 de outubro como cada ano celebramos o Día das Bibliotecas con unha actividade do voluntariado cos maiores da residencia Domus Vi, Estamos a preparar algo fermoso.

Deixamos aquí o cartel da reunión do equipo do voluntariado da biblioteca. Procuraremos seguir a informar do acontecido na reunión para celebrar este Día das Biblioteca. Como cada ano poñeremos información nos corredores do instituto.


sábado, 12 de outubro de 2019

PRIMEIRA XUNTANZA DOS CLUBS DE LECTURA E MANGA

Ola rapaces!
O pasado martes 8 de outubro realmente comezamos a nosa andaina deste curso. Xuntámonos a comer (uns na biblioteca, outros na cafetería). Logo os de Manga fóronse con Vily. Parecéunos que cada vez son máis, pero diso falarán eles no seu propio blog. Os do Club de Lectura quedamos na biblio. Non somos moitos, pero aínda así estamos moi felices de dar a benvida a Sergio e a Raquel, as novas incorporacións. Confiamos en ir medrando paseniñamente. E por suposto, encántanos a volta de Eva.
A noticia é que este curso as nosas inquedanzas van ser dobres: 
  • Por un lado, leremos poesía.
  • Por outro lado, falaremos de cine.

Así que dende aquí anunciamos que a temática deste ano é "CINE E POESÍA" ou "POESÍA E CINE". Dous temas tratados por separado, é dicir, non falaremos de "A poesía no cine" nin de "O cine na poesía". 
A dinámica este curso vai ser diferente das doutros. Polo que non fixamos aquí unha lista de lecturas mes a mes, como faciamos. Cada xuntanza leremos poesía, de diversos autores, dos que cada quen teña a ben escoller. E logo falaremos das películas que nos gustan.
Comezamos o pasado martes coa lectura, elixida por Emilio dun poema de José Manuel Caballero Bonald: "Verdad poética" sobre o mito de Narciso, o que  nos deu moito xogo para falar de mitos, de cadros, de poetas...
Hoxe nos despedimos así, co poema, que pode ser mellor?


Verdad poética

Adolescente de livianos lazos,

lienzo de luna, pétalo impoluto
que cruza el arenal, cruza el exiguo
lindero de los acebuches,
llega al vidrioso estanque,
y allí precisamente,
cuando se inclina para verse a solas,
hace su aparición el asesino.

Sangre junto al tupido seto

de arizónicas, sangre
por los rezumaderos de los caños
y en la huraña ruina
del fortín y en la playa acosada
de pájaros y larvas y alacranes.

¿De quién la transitoria furia,

qué se hicieron
aquellos vengadores? ¿Soy yo acaso
el que oyó las aladas palabras de Tiresias?

-El asesino que buscas eres tú.
Empieza a ser verdad mientras lo escribo.

venres, 11 de outubro de 2019

CONCESIÓN DO SELO DE BIBLIOTECAS ESCOLARES SOLIDARIAS

Ola rapaces!
Non sei onde teño a cabeciña. Pois aínda non comentamos aquí a noticia do verán. A concesión a nosa biblioteca do Selo de Biblioteca Escolar Solidaria que nos otorgou a Xunta.
Como isto acadeu no medio das vacacións estivais, non tivemos tempo de falarlo. E logo con todo a balbordo do inicio do curso, esquecéuseme.
Pero aquí vai a boa nova. Somos unha das poucas bibliotecas que teñen este recoñecemento oficial. E devo dicir que este premio é voso. Realmente é unha honra tervos a vós, os nosos voluntarios: os internos que colaboran no funcionamento día a día dos servizos; e os externos, que acompañan aos maiores coas súas fermosas visitas ao xeriátrico.
E que isto nos sirva para medrar aínda máis no noso compromiso de facer a biblioteca do noso IES na casa común de todos, de dentro e de fóra do centro.
GRAZAS


luns, 30 de setembro de 2019

UN ROTEIRO CON ALFREDO CONDE

Ola rapaces!
Esta fin de semana, algúns profesores do instituto (Teresa, Emilio e Pilar) participaron nun roteiro literario sobre Alfredo Conde en Allariz. 
O propio escritor estivo connosco e percorremos a súa vila natal lendo anacos das súas obras. 
Amablemente o novelista alaricano asinounos un exemplar de súa obra: Xa vai o Griffón no vento, o que será un fermoso recordo: 

"Para o Instituto Sofía Casanova, que seguro que fai honra do nome que o distingue: Alfredo Conde. 
Allariz, 28/set/19".




  1. Anímovos a ler calquera  das súas obras que podedes atopar na nosa biblio. Deixo aquí un listado delas:
  • Osos de santo.
  • Chovida do ceo.
  • Memoria de Noa.
  • Breixo.
  • Azul Cobalto
  • Mementos de vivos...
Vémonos!



mércores, 25 de setembro de 2019

1º REUNIÓN DOS CLUBS DA BIBLIOTECA

Ola rapaces!
O vindeiro martes día 1 de outubro teremos a primeira reunión de todos os clubs da biblioteca, durante o primeiro recreo. Informaremos de todas as iniciativas para este curso. Aquí deixamos o cartel que veredes tamén nos corredores do instituto.

luns, 23 de setembro de 2019

BENVIDA A UN NOVO CURSO

Ola rapaces!
Un ano máis queremos saúdarvos nestes días iniciais e darvos a nosa máis cálida benvida a un novo curso escolar que sempre é unha páxina en branco.
Dende a biblioteca, eu Socas, quero animarvos a encher este libro de fermosos versos. E falando de versos, xa vos anuncio que a temática da tempada no noso Club de Lectura vai ser precisamente iso, versos, é dicir, lemos poesía. Ben, non?
O caso é que moi pronto convocaremos a nosa tradicional xuntanza informativa de tódolos clubs (aínda que sei de boa fonte que os de Escritura xa comezaron... Mi madriña, canto entusiasmo!)
Estade atentos, rapaces... imos despegar...
SOCAS


mércores, 26 de xuño de 2019

TRÍPTICO VERÁN 2019


Ola rapaces!

Xa está aquí o tríptico de verán no que vos recomendavos lecturas para este tempo de lecer. Este curso estivemos a facer pequenas guías de lectura que acompañaban as actividades propostas para a celebración das efemérides que xa deixamos en entradas anteriores do blog: Día de Loita contra a Violencia de Xénero, o Día da Paz, o Día a Muller. Tamén se publicaron outras suxestións de lectura nos murais de exposicións como: O Día do Libro, O Día das Letras Galegas, o Proxecto Venus, etc. Por este motivo, e vendo que os lectores da biblioteca e dos distintos clubs facían recomendacións que nosoutros xa tiñamos publicadas en anteriores guías, pensamos en ofertar algúnhas novidades na estrutura do noso folleto incorporando novas categorías como, premios, humor, e outras seccións. Esperamos que sexan do voso agrado para ler neste tempo de vacacións de verán.
Pola nosa parte queremos agradecer á profesora de Inglés: TERESA CORRAL, que é unha amiga e grande lectora de esta biblioteca, a súa xentileza facendo para esta publicación unha selección de libros que a sorprenderon, gustaron e despertaron o seu interese. Graciñas por todo.
No propio tríptico hai un código QR no que podedes ler as reseñas de cada libro pois enlazan coa páxina "Socas recomenda" deste mesmo blog.
Así que xa non tedes excusa para decir. "É que non sei que ler este verán". Desexamos que teñades tempo de descanso de troula e de lectura. Graciñas por participar en todas as nosas aventuras e Bo verán a todos!


sábado, 22 de xuño de 2019

SOMOS VENUS


Ola compañeiros!
Como podedes ver na entrada do instituto hai unha exposición de traballos que son o resultado dun proxecto iniciado por os nosos veciños do IES Ferrolterra, que trataba de mostrar intuitivamente as distancias entre os planetas do noso Sistema Solar, situando cada instituto da zona, na órbita dun planeta. O noso instituto é Venus por este motivo fixéronse unha variedade de actividades desde diversos departamentos e a biblioteca, coordinados por Rocío Piñón, a profesora de Física e Química. Tamén participaron os alumnos de EPVA de 4º ESO, con a súa profesora María Lanza. Desde a biblioteca sumámonos facendo unha selección e exposición de libros, tanto científicos, como libros de arte ou de poesía sobre Venus.
Podedes ver que hai unha sección de traballos científicos realizados polos compoñentes do Club de ciencias, e unha selección de poemas relacionados con Venus que recompilou o profesor de Lingua Española, Daniel Iglesias.




venres, 21 de xuño de 2019

OS OBXECTIVOS DE DESENVOLVEMENTO SOSTIBLE


Ola compañeiros!

Estamos seguros que estes días estades a ver a conclusión de algúns dos inovadores proxectos que se realizaron durante este curso. No corredor do primeiro andar o alumnado de 3º da ESO, colgou unha exposición de lenzos creados na área de Plástica e Visual, coa súa profesora María Lanza. Con eles tentan dar unha interpretación persoal aos Obxectivos de Desenvolvemento Sostible. Este ano estiveron a traballar nun proxecto chamado: O Mundo que Queremos, no que por medio de diversas actividades profundizaron nestos obxectivos. O que lles motivou é saber que a nosa sociedade enfróntase na actualidade a problemas sobre o futuro, a convivencia, a xustiza social e a sustentabilidade do planeta. Por esta razón, o noso alumnado achegouse a algunhas destas cuestións vendo as posibilidades de implicarse na transformación da realidade.
Desde a biblioteca colaboramos nesta reflexión coa programación das actividades sobre as efemérides que insistiron en  aspectos nos que se profundizou desde este proxecto, como a violencia de xénero, a convivencia en zonas de conflicto, o problema dos refuxiados, e a pobreza que está na orixe das guerras e as desigualdades.

mércores, 19 de xuño de 2019

IX FESTA DAS TARTAS LITERARIAS


Ola rapaces!
Onte foi a nosa "reducida" festa das tartas literarias coa que tradicionalmente despedimos o curso na biblioteca. Todo resultou xenial, como sempre, porque vosoutros ademáis dos doces traedes a ledicia e o entusiasmo con que facedes todas as actividade ás que vos convocamos desde a biblioteca.
Esta vez éramos moitos e moi entregados á festa. Xuntámonos membros de todos os clubs, o club de lectura xuvenil, o voluntariado,  o de Manga, o obradoiro de microescritura e algúns membros do de  teatro. E como cada ano, tamén nos veñen a visitar antigos alumnos dos nosos clubs, como Diego e Ana. É unha enorme alegría encontrarnos novamente e esperamos que non se cansen de vir a vernos.
Este ano fixemos entrega duns diplomas e premios ó alumnado que máis libros solicitou na biblioteca. Os máis lectores tiveron como premio: un diploma, unha axenda, un marcapáxinas e un vale para mercar nunha librería da zona.

Queremos felicitar a Xavier Vilas, Carla Neciosup, Iago Grandal, Lucas Freire, Iago González, Lucas Couce, David Franco e Aimar Moreno.  Paraben a todos eles, e que sigan a ler que é a mellor forma de diversión e aprendizaxe posible.
Desde aquí facemos a proposta para o curso que ven de establecer novas categorías para poder agradecer tanta esforzada dedicación a todos os membros dos nosos clubs.




Moitos de vosoutros sodes merecedores de premios pola vosa entrega ós demáis, con esa alegría e cariño infinito con o que tratades aos maiores da residencia Domus VI, coa que colaboramos no voluntariado. Outros porque estades dispostos a axudar en calquer tarefa ou actividade, sempre atentos ó que se move pola biblioteca. Moitas grazas voluntarios de todos os días e visitantes asiduos. Como non mencionar aos compañeiros dos clubs de lectura xuvenil, de microescritura e do club Manga que animan as reunións coas súas presentacions, cos xogos, co humor, e  o entusiasmo con o que participades en cada sesión. A todos moitísimas grazas.
Queremos facer unha mención especial para a nosa queridísima presidenta do club Manga, Carolina, que está no hospital, para mandarlle toda a nosa forza e desexarlle que teña unha pronta recuperación. 
Deixamos abaixo unhas fotos da nosa festa para que vexades por exemplo que pastéis tan bos  fixeron: Fran, Marta, Lucía, Alba, Estela, Natalia, Yanira, Daniel e Antía, e moitísimas mamás ás que lles agradecemos o excelente traballo.
En fin, como cada ano é un pracer ter contado coa vosa amizade e disfrutado da compañía dun alumnado tan excepcional. Non hai palabras para agradecer como merecedes tanta dedicación. Esperamos seguir a contar con todos vosoutros, e aos que marchades únicamente nos resta desexar que sexades tan felices nos novos centros como nos fixéstedes a nos.



venres, 14 de xuño de 2019

CARTEL FESTA DAS TARTAS LITERARIAS


Ola rapaces!

O próximo día 18 celebraremos, como todos os anos, o remate do curso na biblioteca coa nosa tradicional festa das tartas literarias. Vai xa pola IX edición. Como sabedes, a esta cita coa diversión e os doces estades todos os clubs invitados. Nesta ocasión por razón das probas de avaliación, a nosa cita será máis breve. Quedaremos a comer na biblioteca, teremos a nosa festa con postres que deben ter algún motivo literario e pola tarde teremos clase no horario de sempre. Pero como estamos seguros que a diversión está garantida, quedades todos invitados.